दक्षिण एसिया नेटवर्क टिभी, काठमाडौं, ३० अगस्ट — चीनका दुईवटा युन–२० सैन्य मालवाहक विमान १३ हजार २ सय थान आपत्कालीन राहत सामग्रीसहित आज बिहान काठमाडौं आइपुगेका छन्। विमानमा टेन्ट, कम्बल, स्लीपिङ ब्याग, आपत्कालीन खाद्य सामग्री र प्राथमिक उपचारका सामग्री ल्याइएको छ।
सोही विमानमार्फत चार जना चिनियाँ सुरुङ उद्धार विशेषज्ञ पनि नेपाल आएका छन्। यसअघि आएका पाँच विशेषज्ञसहित हाल नौ जना चिनियाँ सुरुङ उद्धार विशेषज्ञ खोज तथा उद्धार कार्यमा खटिएका छन्।
राहत सामग्री बुझ्न विज्ञान, प्रविधि तथा नवप्रवर्तन मन्त्री महावीर पुन पनि त्रिभुवन अन्तर्राष्ट्रिय विमानस्थल पुग्नुभएको थियो। कार्यक्रममा प्रतिनिधिसभा सदस्य धर्मा केसी र नेपालका लागि चिनियाँ राजदूत चाङ माओमिङ पनि सहभागी हुनुभएको थियो।
राजदूत चाङले चीनबाट आएको यो सहयोग सुरुवात मात्र भएको बताउँदै नेपालका आवश्यकताअनुसार थप सहयोग जारी राख्ने बताउनुभयो। मन्त्री पुनले पनि राहत सामग्री समयमै प्रभावित क्षेत्रमा पुर्याउन आवश्यक समन्वय भइरहेको बताउनुभयो।
चिनियाँ दूतावासका अनुसार विपद् सुरु भएदेखि हालसम्म नेपाली पक्षसँगको समन्वयमा ९४ जना चिनियाँ नागरिक तथा सम्बन्धित व्यक्तिको उद्धार तथा सुरक्षित स्थानान्तरण गरिएको छ।
नेपालमा अगस्ट २६ मा आएको बाढी तथा पहिरोमा हालसम्म ६७५ जनाको मृत्यु भएको र २ हजार ४ सय ९८ जना बेपत्ता रहेको तथ्यांक सार्वजनिक गरिएको छ।
