काठमाडौं भदौ १ गते । नागपञ्चमीका अवसरमा काठमाडौंको नक्सालस्थित ऐतिहासिक नागपोखरीमा बिहानैदेखि श्रद्धालुहरूको उल्लेख्य भीड लागेको छ। नाग देवताको पूजा तथा दर्शनका लागि काठमाडौं उपत्यकाका विभिन्न स्थानबाट भक्तजनहरू नागपोखरी पुगेका छन्।
बिहानैदेखि पोखरी परिसरमा भक्तजनको आवागमन बढेको थियो। श्रद्धालुहरू हातमा पूजा सामग्री बोकेर नाग देवताको पूजा तथा दर्शनका लागि लामबद्ध भएका थिए। पोखरी परिसर वरपर धार्मिक गतिविधिसँगै भक्तजनको चहलपहल बढेको देखिन्थ्यो।
नागपोखरी बाहिर स्थानीय व्यापारीहरूले पूजा सामग्रीका पसल राखेका थिए। भक्तजनहरूले नागको तस्बिर, दूध, फूल, धूप, नरिवल, फलफूललगायतका सामग्री खरिद गरिरहेका थिए।
पोखरी परिसरमा प्रवेश गरेपछि पण्डितहरूले श्रद्धालुलाई टीका लगाइदिने तथा पूजामा सहजीकरण गर्ने व्यवस्था गरेका थिए। भक्तजनहरू पूजाका थालीसहित नाग देवताको दर्शन गर्दै परिवारको सुख, शान्ति र समृद्धिको कामना गरिरहेका थिए।
नागपञ्चमीको मुख्य आकर्षण पोखरीको मध्यभागमा रहेको नागको मूर्ति बनेको थियो। भक्तजनहरूले पोखरीको बाहिरी भागबाटै नागको मूर्तिमा दूध, फूल तथा अन्य पूजा सामग्री अर्पण गर्दै पूजा गरेका थिए। पूजा गर्न श्रद्धालुहरू आफ्नो पालो कुरिरहेका थिए।
पूजा सम्पन्न भएपछि भक्तजनका लागि प्रसाद वितरणको समेत व्यवस्था गरिएको थियो। भीड व्यवस्थापन तथा धार्मिक कार्यक्रमलाई व्यवस्थित बनाउन मन्दिर व्यवस्थापन समिति र स्वयंसेवकहरू परिचालन भएका थिए।
नागपञ्चमीका दिन नागको पूजा गर्दा वर्षा, पानी, उर्वरता तथा पारिवारिक सुख–शान्ति प्राप्त हुने धार्मिक विश्वास छ। यही विश्वासका कारण काठमाडौंका विभिन्न नागस्थानमा नागपञ्चमीका दिन विशेष पूजा तथा दर्शन गर्ने परम्परा रहँदै आएको छ।
