काठमाडौँ, साउन १ गते । विश्वकप फुटबल–२०२६ अन्तर्गत इङ्ग्ल्यान्डविरुद्धको सेमिफाइनलमा प्राप्त २–१ को जितमा अर्जेन्टिनाका कप्तान लियोनेल मेसीले गोल गर्न सक्नुभएन । यद्यपि मेसीले दुवै गोलमा ‘एसिस्ट’ गरेर अर्जेन्टिनाको जितमा महत्वपूर्ण योगदान दिनुभयो । उहाँ खेलपछि ‘प्लेअर अफ दी म्याच’ पनि चुनिनुभयो ।
इन्जो फर्नान्डेज र लाउटारो मार्टिनेजले गरेको गोलमा एसिस्ट गरेपछि मेसी सर्वाधिक गोलकर्तालाई प्रदान गरिने गोल्डेन बुटको नजिक पनि पुग्नुभएको छ । मेसी अहिलेसम्म आठ गोल र चार एसिस्टसहित गोल्डेन बुटको होडमा सबभन्दा अगाडि हुनुहुन्छ । फ्रान्सका स्ट्राइकर किलियन एम्बापे पनि मेसी सरह आठ गोल नै गर्नुभएको छ तर उहाँको तीन एसिस्ट मात्र छ । अब एम्बापेसमक्ष तेस्रो स्थानका लागि हुने खेल गोल्डेन बुट जित्ने अन्तिम अवसर हो । यसै गरी मेसीसमक्ष पनि फाइनलमा गोल गरेर गोल्डेन बुट पक्का पार्ने मौका छ । एम्बापे लगातार दोस्रो पटक गोल्डेन बुट जित्ने दाउमा हुनुहुन्छ ।
विश्वकपमा दुई पटक सर्वश्रेष्ठ खेलाडीलाई दिइने गोल्डेन बलको हकदार भइसके पनि मेसीले गोल्डेन बुट भने जित्न सक्नुभएको छैन । पछिल्लो संस्करणमा सात गोल गरेर पनि उहाँ एम्बापेभन्दा पछाडि पर्नुभएको थियो । सन् २०१४ मा चार गोल गरेर उहाँ तेस्रो स्थानमा रहनुभएको थियो । मेसी सर्वाधिक अन्तर्राष्ट्रिय गोल गर्ने सूचीमा भने दोस्रो स्थानमा हुनुहुन्छ । पोर्चुगलका व्रिmस्टियानो रोनाल्डोले १४६ र मेसीले १२५ अन्तर्राष्ट्रिय गोल गर्नुभएको छ ।
यस विश्वकपमा मेसीले लगातार नौ विश्वकपमा गोल गर्ने खेलाडीको कीर्तिमान राख्नुभएको छ । पछिल्ला आठ विश्वकपमा मेसीले कुल १२ गोल गर्नुभएको छ । मेसी विश्वकप फुटबलका सर्वकालीन सर्वाधिक गोलकर्ता पनि हुनुहुन्छ । उहाँले विश्वकपमा ३३ खेलमा सबभन्दा बढी २१ गोल गर्नुभएको छ । फ्रान्सका एम्बापे एक गोलले मेसीभन्दा पछाडि हुनुहुन्छ । सात गोलसहित सर्वाधिक गोलकर्ताको सूचीमा तेस्रो स्थानमा रहेका नर्वेका एर्लिङ हालान्ड पनि विश्वकपबाट बाहिरिसक्नुभएको छ । यद्यपि इङ्ग्ल्यान्डका कप्तान ह्यारी केन र जुड बेलिङ्घमले समान छ–छ गोल, फ्रान्सका ओसमान डेम्बेले र स्पेनका मिकेल ओयरजाबल (पाँच/पाँच गोल) भने गोल्डेन बुट जित्ने होडमा कायम हुनुहुन्छ तर यसका लागि यी सबै खेलाडीले आआफ्नो अन्तिमा खेलमा गोलको वर्षा गर्नुपर्ने हुन्छ । जुन यथार्थपरक देखिँदैन । एजेन्सी
