काठमाडौँ, साउन १२ गते । लोकगायिका माया गुरुङ (देवीमाया थापा गुरुङ) को सम्मानमा ‘माया गुरुङ साङ्गितिक साँझ’ हुने भएको छ ।
राष्ट्रिय लोक तथा दोहोरी गीत प्रतिष्ठान नेपाल, जिल्ला कार्यसमिति लमजुङले सदरमुकाम बेँसीशहरमा आगामी असोज १० गते ‘माया गुरुङ साङ्गितिक साँझ’ कार्यक्रम आयोजना गर्ने भएको हो । कार्यक्रमबारे आयोजकले बेँसीसहरमा पत्रकार सम्मेलन गरी औपचारिक घोषणा गरेको हो ।
लोकगायिका माया गुरुङको चार दशकभन्दा लामो साङ्गितिक योगदानको सम्मान गर्दै आयोजना गर्न लागिएको कार्यक्रमबाट कलाकार कल्याणकारी कोष स्थापना गर्ने उद्देश्य राखिएको प्रतिष्ठानले जनाएको छ ।
बेँसीशहर नगरपालिका –८ स्थित फूलबारी मञ्चमा अपरान्ह ४ बजेदेखि सुरु हुने कार्यक्रममा राष्ट्रिय तथा स्थानीय ख्यातिप्राप्त लोक तथा दोहोरी कलाकारको प्रस्तुति रहनेछ ।
प्रतिष्ठानका अध्यक्ष प्रशान्त तामाङले नेपाली लोकसंगीतका अग्रज कलाकारको सम्मानसँगै कलाकारको सामाजिक सुरक्षालाई संस्थागत गर्ने उद्देश्यले साङ्गितिक कार्यक्रम आयोजना गरिएको बताउनुभयो । कार्यक्रम संयोजक अनुज अधिकारीले मौलिक नेपाली लोकभाकाको संरक्षण र प्रवर्धनसँगै अग्रज कलाकारप्रति साङ्गितिक साँझ फलदायी हुने बताउनुभयो ।
बेँसीसहर नगरपालिका–५, नाल्मामा जन्मिनुभएकी माया गुरुङ नेपाली लोकसंगीतको मौलिक पहिचान स्थापित गर्ने अग्रज गायिकामध्ये एक हुनुहुन्छ । बाल्यकालदेखि नै गुरुङ समुदायको रोधी, मेलापात, विवाह, पूजापर्व र गाउँघरमा गुञ्जिने लोकभाकासँग हुर्किउनुभएकी उहाँले औपचारिक संगीत शिक्षा नलिए पनि गाउँकै सांस्कृतिक परिवेशलाई आफ्नो संगीत विद्यालय बनाउनुभयो ।
करिब १२ वर्षको उमेरदेखि सार्वजनिक रूपमा गीत गाउन थाल्नुभएको उहाँले वि.सं. २०४० सालदेखि व्यावसायिक रूपमा लोकसंगीत क्षेत्रमा सक्रिय हुनुहुन्छ ।
