काठमाडौं, भदौ २५, २०८२ – ल्हासाबाट काठमाडौंका लागि उडान भरेको हिमालय एयरलाइन्सको विमान मंगलबार त्रिभुवन अन्तर्राष्ट्रिय विमानस्थल (टीआईए) बन्द भएको कारण पोखरा अन्तर्राष्ट्रिय विमानस्थल (पीएचआर) तर्फ डाइभर्ट गरिएको छ।

उडान नम्बर HIM775 दिउँसो १२:३५ बजे काठमाडौं अवतरण हुने तालिका थियो। तर टीआईएको एयरोड्रोम सञ्चालन बन्द भएपछि विमानलाई १:५९ बजे पोखरातर्फ अवतरण गराइएको हो।

विमानमा ६५ जना यात्रु र ७ जना चालक दलका सदस्य रहेका थिए। एयरलाइन्सका अनुसार सबै यात्रु र चालक दल सुरक्षित छन्। यात्रुको सुरक्षालाई मध्यनजर गर्दै पोखरातर्फ डाइभर्ट गरिएको जनाइएको छ।

हिमालय एयरलाइन्सले यात्रुलाई परेको असुविधाप्रति क्षमायाचना गर्दै आवश्यक व्यवस्था मिलाइने जनाएको छ।