एस् ए टी भी २६ जेठ, काठमाडौंः गत फागुन १४ बाट प्रदर्शनमा आएको फिल्म ‘लाज शरणम्’ले बिहीबार प्रदर्शनको १०० दिन पूरा गरेको छ । यो फिल्मलाई अझै पनि रञ्जना हलले दैनिक एक शो दिइरहेको छ ।
यो फिल्मले न्यून शो र अकुपेन्सीका साथ प्रदर्शनको १०० दिन पूरा गरेको हो । तथापि कमै फिल्मले १०० दिनको यो सफलता हात पार्छन् ।
निर्माता नवीन श्रेष्ठले मदर किड्स पाउन्डेसनमार्फत् सिन्धुपाल्चोकको चौतारा साँगाचोकगढीस्थित श्री बालकल्याण आधारभूत विद्यालयका विद्यार्थीलाई सहयोग गरी फिल्म सफलताको खुसी साटेका हुन् ।
उनका अनुसार विद्यार्थीहरुलाई ३० थान स्कुल ड्रेस, ब्याग र पानी पिउने बोतल सहयोग गरिएको हो ।
टेलिसिरियल ‘सक्किगोनि’ टिमले बनाएको यस फिल्मको निर्देशक कुमार कट्टेल जिग्री हुन् । यो फिल्ममा सीताराम कट्टेल धुर्मुश शीर्ष भूमिकामा छन् ।
जेपीटी क्रिएसनको ब्यानर बनेको ‘सक्किगोनि’मा कलाकारहरु सागर लम्साल ‘बले’, हरिश निरौला ‘कक्रोच’, अर्जुन घिमिरे ‘पाडे’ र कमलमणि नेपाल ‘खुपिका बा’को पनि अभिनय रहेको छ ।
उनीहरुसहित विजय बराल, बुद्धि तामाङ, मुकुन्द श्रेष्ठ र महेश त्रिपाठी पनि मुख्य भूमिकामा रहेका छन् । दयाहाङ राईले गेस्ट अपिरियन्स दिएका छन् ।
निर्माता श्रेष्ठ अर्को फिल्म ‘पाँच पण्डव’ निर्माणको तयारीमा छन् । उनले ‘लाज शरणम्’को स्किवेल पनि आउने बताएका छन् ।
