एस् ए टी भी २५ जेठ, काठमाडौंः मोरङको कटहरी गाउँपालिका–२ हल्दीबारीमा २ सय शैय्याको सामुदायिक अस्पताल निर्माण गरिएको छ ।
जीवन विकास सामुदायिक अस्पताल तथा टेक्निकल एजुकेसन फाउन्डेसनको शनिबार प्रधानमन्त्री केपी शर्मा ओलीले उद्घाटन गरेका हुन् । यो अस्पतालमा कुल लगानी दुई अर्ब रुपैयाँ रहेको छ ।
अस्पतालका अध्यक्ष तथा प्रतिनिधिसभा सदस्य योगेन्द्र मण्डलले अस्पताललाई पाँच सय शय्या क्षमतासहितको मेडिकल कलेजमा रूपान्तरण गर्ने दीर्घकालीन योजना रहेको जानकारी दिए । मण्डल मोरङ क्षेत्र नम्बर ५ बाट स्वतन्त्र उम्मेदवारका रूपमा निर्वाचित भएका थिए ।
उनका अनुसार अस्पतालमा हाल २५ शय्याको आईसीयू, ९ शय्याको एनआईसीयू, १० शय्याको सीसीयूसहित अत्याधुनिक सेवा सुरु भइसकेको छ । आकस्मिक सेवा, ओपीडी सेवा, पेनलेस डेलिभरी, दुरबिन प्रविधिबाट सर्जरी, बालरोग उपचार तथा डायलासिस सेवा उपलब्ध हुनेछ । २०० भन्दा बढी जनशक्ति कार्यरत अस्पतालमा दुई दर्जनभन्दा बढी विशेषज्ञ चिकित्सकहरू सेवा दिनेछन् ।
अस्पतालसँगै स्थापना गरिएको टेक्निकल एजुकेसन सेन्टरमार्फत एमबीबीएस, नर्सिङ, फार्मेसी, मेडिकल ल्याब, फिजियोथेरापी र रेडियोलोजी विषयमा स्नातक र स्नातकोत्तर तहका कार्यक्रम सञ्चालनको तयारी पनि भइरहेको मण्डलले जनाए ।
आठ तलाको तीन ब्लकमा फैलिएको अत्याधुनिक अस्पताल तथा शिक्षण संरचना बालमैत्री, महिला, अपाङ्ग र अशक्तमैत्री रूपमा डिजाइन गरिएको छ ।
