एस् ए टी भी ७ चैत्र, पोखराः नेपाल चीन कूटनीतिक सम्बन्धको ७० औँ वार्षिकोत्सव , नेपाल भ्रमण वर्ष २०२५ तथा पोखरा पर्यटन वर्ष २०२५ को अवसरमा छङ्दु -पोखरा सिधा व्यावसायिक अन्तर्राष्ट्रिय चार्टर उडान हुने भएको छ।
पहिलो विमान यही चैत्र ५ गते पोखरा अन्तर्राष्ट्रिय विमानस्थलमा अवतरण भएको थियो। सोही अवसरमा ६ गतेको साँझमा 'सात दशकको गौरव,हृदय जोड्ने कलात्मक लय' विशेष कार्यक्रम सम्पन्न भएको छ।
कार्यक्रममा चीन छिङ्हाई प्रान्त युशु क्षेत्र बाट आएका कलाकारहरूले कलात्मक प्रस्तुतिहरू प्रस्तुत गरेका थिए।
कलाकारहरूले आफूहरू चिनियाँ जनताको नेपाल र नेपाली जनता प्रतिको माया र शुभेच्छा बोकेर नेपाल आएको बताए।
गण्डकी प्रदेश उद्योग तथा पर्यटन मन्त्री मित्रलाल बस्यालले विश्वकै उत्कृष्ट मध्येको एक पर्यटकीय नगरी पोखरामा अन्तर्राष्ट्रिय उडान हुने खबरले आफूहरू निकै खुसी र उत्साहित भएको बताए। यसले समग्र पर्यटनमा पार्ने सकारात्मक असर बारे पनि उनले प्रस्ट्याए।
नेपाल स्थित जनवादी गणतन्त्र चीनको राजदूतावासका डीसिएम वाङ सिनले नेपालको विकासमा पछिल्ला केही वर्षमा चीनले तदारुकता देखाएको र त्यसैको फलस्वरूप यो व्यावसायिक उडान सम्भव भएको बताए।
७० वर्ष पुरानो यो कूटनीतिक सम्बन्धको अझै विस्तार र मजबुतीमा यस्ता सहयोग र सहकार्य अनिवार्य रहेका छन्। अझ विशेष चीन जस्तो समृद्ध देशको प्राविधिक प्रगतिको थोरै अंश नेपालले सिको गर्न पाए देश कायापलट हुन केही समय नलाग्ने विश्वास छ।
