एस् ए टी भी २८ फाल्गुन, काठमाडौँः पाकिस्तानको बलूचिस्तान प्रान्तमा मंगलबार चारसय भन्दा बढी यात्री सवार एक रेल हतियारधारी चरमपन्थीले कब्जामा लिएका छन् ।
आक्रमणको जिम्मेवारी बलूच लिबरेशन आर्मी (बीएलए)ले लिएको छ । यो आक्रमण क्वेटाबाट पेशावर जाँदै गरेको जाफर एक्सप्रेसमाथि भएको थियो ।
बीबीसी उर्दुका अनुसार पाकिस्तानको सैन्य सुत्रले जाफर एक्सप्रेस आक्रमणपछि त्यसमा रहेका यात्रुमध्ये १०४ जनालाई उद्धार गरिसकिएको छ । यस अभियानका क्रममा १६ जना बलूच लडाकू मारिएका छन् ।
यसैबीच जाफर एक्सप्रेसका ८० यात्रु मच्छ रेलवे स्टेशनमा पुगेका छन् । उनीहरुको प्राथमिक उपचार भइरहेको छ । रेलवे अधिकारीहरुका अनुसार ९ डिब्बाको रेलमा चार सयभन्दा अधिक यात्री रहेका थिए ।
यता उक्त कारबाहीमा ३० भन्दा बढी पाकिस्तानी सैनिक मारिएको बताइएको छ ।
पाकिस्तानका गृह राज्यमन्त्री तलाल चौधरीले रेलमा रहेका कैयौं यात्रीलाई बलूच फौजले पहाडी क्षेत्रमा बन्धक बनाएर लिएको बताएका छन् ।
मंगलबार सरकारका प्रवक्ताले डन न्यूजपेपरसँग कुराकानी गर्दै रेलमा ठूलोमात्रामा गोलाबारी भएको बताएका छन् । यता बलूच लिबरेशन आर्मीले रेलमा सवार यात्रु र कैयौं सुरक्षा बलका जवान आफ्नो कब्जामा रहेको दाबी गरेको छ । यदि कुनै सैन्य कारबाही गरिए गम्भिर परिणाम भोग्नुपर्ने चेतावनीसमेत दिएको छ ।
बीएलएले आफ्ना लडाकुको रिहाइको बदलमा बन्धकको फेरबदल गर्नका लागि सरकारलाई ४८ घण्टाको समय दिएको छ ।
बीएलए पाकिस्तानको बलूचिस्तान प्रान्तको एक उग्रवादी समूह हो । छुट्टै देशको माग गर्दृ आएको यो समूहले पाकिस्तानी सेनामाथि लगातार आक्रमण गर्दै आएको छ । अफगानिस्तान र भारत सरकारको यो समूहलाई समर्थन रहेको पाकिस्तानले आरोप लगाउँदै आएको छ ।
भारत–पाकिस्तान विभाजनका क्रममा यो क्षेत्र एक स्वतन्त्र देशका रुपमा रहनुपर्नेमा पाकिस्तानले सैन्य बलको सहयोगमा पाकिस्तानभित्रै गाभेको यहाँका नागरिकको गुनासो छ । पाकिस्तानले बलुच समूहलाई सन् २००७ मा आतंकवादी संगठनको सूचीमा राखेको थियो ।
