असार ६ गते । बुधवार रातीदेखि परेको अविरल वर्षाले कल्भर्ट बगाए पछि भानु मार्गको डुम्रे–इन्द्रावती खण्ड अवरुद्ध भएको छ । तनहुँको भानु नगरपालिका–६ टुहुरेपसल स्थित खत्री खोलामा आएको बाढीले कल्भर्टमा पूर्ण क्षति पुर्याएपछि अवरुद्ध भएको हो ।
भानु नगरपालिका वडा नम्बर ६, ७ र १३ का बासिन्दा यातायात सेवाबाट वञ्चित हुनु परेका भानु नगरपालिका–१३ चन्दावतीका कुवेर खनालले जानकारी दिनुभयो । यस मार्गका उपभोक्ता बसौँ अघि देखि पुलको माग राख्दै आए पनि पुरा नहुँदा जनताले सास्ती भोग्नु परेको खनाल बताउनुहुन्छ । खनालले भन्नुभयो, गत वर्ष पनि कल्भट बाढीले बगाएको थियो, वर्षै पिच्छे कल्भर्ट बनाउने खर्चले पुल बनाउन सकिन्छ तर त्यसमा ध्यान पुगेको छैन ।
खत्री खोला ठाडो खोला भएकाले पुल बनाउनुको विकल्प नभएको खनालको भनाई छ । भानु नगरपालिकाको उपप्रमुख उमा गोतामेले मोटर गुड्ने पुल निर्माणको लागि सङ्घ तथा प्रदेश सरकारसँग माग गरिएको भए पनि बजेट विनियोजन नगरेको बताउनुभयो । स्थानीय बासिन्दालाई समस्या नपरोस् भनेर कल्भर्ट मर्मत गर्ने काम भइरहेको उपप्रमुख गोतामे बताउनुहुन्छ । यातायात आवागमन बन्द हुँदा यात्रु अलपत्र परेका छन् ।
